23 Out Os Xeoparques UNESCO de España asócianse
Os Xeoparques UNESCO de España asócianse para promover a cooperación e accións conxuntas
- Inicialmente forman parte do novo colectivo oito territorios integrados na rede española.
- A presentación oficial tivo lugar durante as X Xornadas Abertas celebradas en Montserrat.
Os territorios integrados na Rede Española de Xeoparques UNESCO constituíron formalmente a Asociación Xeoparques UNESCO de España, un novo organismo que busca reforzar a cooperación entre estes espazos e promover accións conxuntas a nivel estatal. A creación desta entidade responde á necesidade de contar cunha estrutura estable que permita coordinar esforzos, optimizar recursos e dar maior visibilidade ao labor que desenvolven os xeoparques en todo o país. Ata o de agora, a Rede Española funcionaba como un espazo de intercambio e traballo técnico, pero carecía dunha figura xurídica propia que facilitase a xestión conxunta de proxectos, a captación de fondos ou a contratación de servizos comúns.
Entre os seus principais obxectivos están facilitar contratacións conxuntas, acceder de forma coordinada a axudas e subvencións, e desenvolver proxectos de promoción científica, turística e educativa. A nova asociación tamén pretende impulsar a participación colectiva en feiras como FITUR, crear produtos turísticos e educativos de ámbito estatal e promover iniciativas de financiamento compartido que beneficien o conxunto da rede. Ademais, apoiará iniciativas locais e económicas, reforzará a colaboración entre os seus membros e con outras entidades, e xestionará recursos e actividades que impulsen a ciencia, a educación, o turismo e o desenvolvemento sostible dos territorios que representa.
A asociación, cuxa presentación oficial tivo lugar durante as X Xornadas Abertas celebradas en Montserrat, iniciou o seu camiño cos Xeoparques Las Loras, Orígens, Costa Vasca, Cabo Ortegal, Maestrazgo, Montañas do Courel, Cataluña Central e Lanzarote, e prevese que nos próximos días se incorporen dous xeoparques máis, e que o resto se sume a medida que os seus órganos de goberno aproben a adhesión.
«A constitución deste colectivo responde á necesidade de dotar os Xeoparques dun marco común que reforce a súa coordinación e capacidade de acción conxunta. Nos últimos anos, a colaboración entre estes territorios medrou notablemente, así como a súa interlocución coas administracións públicas e a sociedade. Para consolidar este traballo e facilitar unha xestión máis eficiente e visible de cada territorio, era necesario dar un paso máis na súa organización», sinala Karmah Salman, coordinadora actual da Rede de Xeoparques Españoles.
Con esta iniciativa, os Xeoparques UNESCO de España buscan reforzar a súa presenza e coordinación, creando sinerxías que contribúan á preservación e divulgación do patrimonio xeolóxico e cultural do país.
Unha rede que une ciencia, educación e desenvolvemento rural. Os Xeoparques UNESCO son territorios que destacan polo seu patrimonio xeolóxico singular e que empregan ese valor como motor para promover a educación, a investigación e o desenvolvemento sostible. En España existen actualmente 18 xeoparques recoñecidos pola UNESCO, repartidos por todo o territorio e xestionados a través dunha rede coordinada polo Comité Nacional de Xeoparques, dependente do Programa Internacional de Ciencias da Terra e Xeoparques (IGGP).
Cada un deles combina a conservación do patrimonio natural e cultural coa dinamización económica das comunidades locais. Os seus proxectos abranguen desde a divulgación científica ata o ecoturismo, a educación ambiental ou a posta en valor dos recursos tradicionais vencellados ao territorio.
Neste contexto, a nova asociación pretende reforzar a voz común dos xeoparques ante as administracións públicas, facilitar a súa interlocución con organismos nacionais e internacionais e contribuír a unha estratexia conxunta de comunicación e promoción.
No Comments